இணையத் தளத்தை பயன்படுத்தி போதைப் பொருள் கடத்தல்!

பிரிட்டன் நாட்டு சிறையில் இருக்கும் குற்றவாளி ஒருவர், போதைப் பொருள் கடத்தல் உட்பட தன் சட்டவிரோத நடவடிக்கைகள் மற்றும் எதிரிகளை அச்சுறுத்தல் போன்றவற்றிற்கு பேஸ்புக்கை பயன்படுத்தி வருவதாக பத்திரிகை ஒன்றில் செய்தி வெளியாகி உள்ளது.இதுகுறித்து, பத்திரிகை ஒன்றில் வெளியான செய்தி:பிரிட்டன் நாட்டை சேர்ந்த மிகப் பெரிய தாதா, காலின் கன். இவர், கொலை குற்றத்திற்காக, 35 ஆண்டுகள் சிறை தண்டனை விதிக்கப்பட்டு, தற்போது, பிரிட்டன் சிறையில் உள்ளார்.

எனினும், அவர், போதைப் பொருள் கடத்தல் மற்றும் சட்டவிரோத நடவடிக்கைகள் ஆகியவற்றை சிறையில் இருந்தே, இன்னும் வழிநடத்தி வருகிறார். இதற்கு அவர், பேஸ்புக் எனும் சமூக இணையதளத்தை பயன்படுத்துகிறார். கடந்த இரண்டு மாதங்களாக இந்த இணையதளம் மூலம் அவர், சர்வசாதாரணமாக, தன் நண்பர்களை தொடர்பு கொள்கிறார்.இவ்வாறு அந்த செய்தியில் கூறப்பட்டுள்ளது.

இதுகுறித்து, காலின் கன் கூறுகையில், "பேஸ்புக்கில், புதிய கணக்கு தொடங்க, சிறைத் துறை அதிகாரிகள் எனக்கு அனுமதி வழங்கினர். ஏனென்றால், அது என் அடிப்படை உரிமை" என்றார்.எனினும், அவரது பேஸ்புக் கணக்குகள் கடந்த சனிக்கிழமை முதல் முடக்கப்பட்டது.

இதுகுறித்து, நீதித்துறை செய்தி தொடர்பாளர் கூறியதாவது: சிறையில் இருக்கும் கைதிகள், சமூக இணையதளங்களை சட்டவிரோத தொழில் நுட்பங்கள் மூலம் தவறாக பயன்படுத்துவது கவலையளிப்பதாக உள்ளது. கல்வி சார்பான பயன்பாட்டை தவிர பிறவற்றிற்கு இணையதளங்களை பயன்படுத்தாமல் இருக்க நடவடிக்கை எடுக்க வேண்டும். சிறையில் இருக்கும் கைதிகளின், இணையதள பயன்பாட்டை, பணியாளர்கள் மிக கவனமாக கண்காணிக்க வேண்டும்.இவ்வாறு காலின் கன் கூறினார்.